Ei merci Hameln

 

Komische Nacht Hameln

Irchendwo in de Fußgängerzon vun Hameln

Die Komisch Naacht in dem scheene Städtche Hameln hat werklich viel Spaß gemacht. Ihr sinn e echt klores Publikum geween unn hann mich in denne fünf Werttschafte scheen bejuwelt. Ohne Eich hätt ich die 5 x 25 Minuude beim Witze-Langlauf nett iwwerstann. Dodevor e digges merci. Ich komm geere widder. Unn dodruff frei ich mich!

Die Komisch Naacht is eens der erfolgreischte Fertsmacherdinger in Deitschland. Denne Spaß-Marathon gebbts schunn seid einiche Johr in iwwer 25 deitsche Städt.

An so nem Owend trete unnerschiedliche Komiker unn annere Fertsmacher uff, die de Leit unnerhaltsam de ganze Owend dummes Zeich vezähle. Es is so e Art Querschnitt dorch denne momentane Komikerhaufe in Deitschland. In jedi Wertschaft komme an so nem Owend fünf Komiker fa jeweils 25 Minutte. Desweche muss du nett vunn Wertschaft zu Wertschafft laafe, um die unnerschiedliche Komiker zu siehn, sonnern du kafscht dir e Intrittskart fa die Lieblingswertschaft. Die Komiker müsse nämlich an demm Owend vunn Wertschaft zu Wertschaft laafe.